by 「時間管理大師」原本是一個正面嘅褒義詞，不過自從被一臺灣歌手汙染咗之後就變成咗一個貶義詞。
近日，TVB「長腳蟹」女神呂慧儀終於為呢個詞平反。因為失婚後又要獨力養仔、又要拍劇、又要做生意嘅佢，竟然仲有時間讀書——仲啱啱完成咗英國牛津大學賽德商學院嘅商科課程。
「熊若水」真係威水，「長腳蟹」真係唔係花瓶。雖然離咗婚湊住個仔，不過42歲嘅呂慧儀近年可以話係憑實力行出自己嘅第二人生。
佢憑住《愛‧回家之開心速遞》「熊若水」嘅角色成功入屋，成為劇集臺柱。仲同劇中嘅張景淳組成人氣「龔水CP」，甚至被多次傳出戲假情真，二人關係非比尋常。
當大家都覺得呂慧儀好幸運，事業發展唔錯，桃花暢旺時，其實風光背後都係因為佢一直默默努力。呂慧儀係2006年港姐季軍，
喺2011年同選過香港先生嘅黃文迪拉埋天窗，婚後生咗阿仔黃柏翹（蟹籽）。不過啱啱過咗七年之癢後嘅2019年，黃文迪就被影到同索女浪漫搭巴士——二人舉止親密，又餵糖又錫面珠咁。
正所謂寧被人知莫被人見，於是呂慧儀火速同黃文迪離婚，然後帶埋阿仔做單親媽媽。離婚之後嘅人生，呂慧儀唯有靠自己，獨力養仔、拍劇搵錢，
之後又慢慢開始學做生意。咁忙之餘，佢仲不忘進修自己，果然係一個優秀嘅時間管理大師。呂慧儀日前喺社交平臺分享完成課程嘅時候就話，一開始報讀牛津時係完全唔敢同人講。
因為覺得自己太耐冇讀書會好難適應，怕跟唔上。不過為咗增值自己、為咗做阿仔嘅榜樣，佢用曬所有空閒時間去學習：
等埋位時、做美甲時、陪阿仔遊水時等等零碎時間，佢都會打開功課做筆記，毅力驚人。呂慧儀話最開心嘅唔止係完成課程，仲可以同阿仔一齊學習一齊努力，成為阿仔嘅讀書Buddy。
有付出就有收穫，最後當然係成功完全呢個Executive Leadership/行政主管課程，仲識到一班國際大企業高管嘅同學𠻹。雖然呂慧儀入行之後，長期都係做花瓶角色，
不過、其實佢係學霸一名。當年中七攞過理科全級第一，中學畢業會考成績中，語文同文化兩科仲攞到雙A嘅好成績。然後成功考入香港科技大學電子工程系，
畢業之後做過老師，再之後就係參選港姐入行嘅事了。呢啲咁優秀嘅履歷，真係好容易被佢嘅靚女容貌掩蓋。演藝事業上位之後，呂慧儀同樣都招人妒忌，
就好似2020年被人指佢「扮阿姐」。指佢拍劇耍大牌呼喝其他同事，包括特約演員，及常駐演員群姐、池美麗同食屎陳師奶等等。
不過爆料一出之後，緋聞男友張景淳就即刻出手護花，打埋千字文力撐呂慧儀係「努力媽媽」。指呂慧儀日拍夜拍，唔食lunch都要養家，唔值得被人亂噏。
之後就冇之後，似乎爆嘅都係眼紅流料。講到感情方面，呂慧儀同張景淳呢對螢幕CP，又真係幾深得《愛回家》粉絲嘅喜愛。佢哋除咗喺公仔箱裡面親密互動之外，
現實中亦都多次傳出戀情。包括生日送蛋糕、節日送驚喜、情侶戒指、箍頸冧爆自拍等等。雖然有一種可能係為咗劇集宣傳，
不過二人嘅眼神動作又好難呃到人，處處顯示關係並不普通。難怪唔少粉絲經常都會追問：妳哋係咪真係一齊？依家事業有成，學業有成，阿仔又長大，呂慧儀都係時候諗嚇戀情喇。
如果真係同張景淳修成正果，咁就真係連粉絲都覺得圓滿到不得了。
