by 最近港姐何依婷喺社交平台上載一段9個月大囡囡學琴嘅短片，原本只係分享日常，卻意外引起網民熱烈討論。
原因在於短片背景，清楚拍到紅磡一個市值由三千萬起跳嘅豪宅，兼擁一覽無遺嘅維港全海景。有唔少網民認為，影片重點似乎唔只係小朋友學琴，
更像係刻意展示居住環境，質疑佢係借機「炫富」。亦有人補充，咁「意外」影到維港真係好巧合，尤其係教個未夠1歲嘅BB彈琴。
雖然部分網民嘅焦點都落咗喺豪宅嘅海景嗰度，但亦有網民護航，話人哋真係有錢呀嘛，分享生活又話人哋曬命。
● 公屋女神，入行備受力捧何依婷係2017年港姐亞軍，出身於基層家庭，由細到大一直住喺黃大仙公屋。讀書好叻嘅佢，喺首屆DSE考到27分入讀城大商學院，
之後仲攞到獎學金去英國留學。選美入行之後，何依婷好快就受到TVB力捧，升呢快過火箭。2021年，亦即係佢入行短短4年，
就已經成為《星空下的仁醫》女配角、《十月初五的月光》女主角，榮升花旦行列。之後再憑住《新聞女王》嘅徐曉薇一角人氣進一步急升拍過多套重頭劇嘅佢，
演技亦有所進步，好多觀眾對佢嘅印象亦都非常深刻。雖然星途暢旺大好前程，不過喺2023年何依婷就毅然選擇咗結婚，嗰年佢先29歲，而近年佢仲減產專心湊女。
● 嫁入豪門，升呢人生勝利組何依婷嘅老公係佢大學同學，大佢1歲，家族從事物流行業，係標準嘅富二代。雖然之前有傳過佢同羅天宇喺拍《十月初五的月光》嘅時候撻著，
煞科宴仲拖住手夾公仔sweet到爆。不過呢啲似乎都係劇組嘅宣傳需要，因為何依婷一直都否認撻著羅天宇。加上早就有富二代男友呢個筍盤，冇必要再同「港姐殺手」羅天宇有啲咩啦。
而自從嫁入豪門之後，何依婷嘅生活又真係升呢唔少，住豪宅、揸名車、周身名牌、周遊列國呢啲都係必不可少㗎喇。不過講真，
人哋都只係同好多人一樣喺社交平台分享吓美好生活啫，又真係未至於好似有啲網民認為嘅曬命炫富。Keep得好好，產後依然少女講到外貌方面，何依婷當然係靚女，
而且好多人都話佢比同屆嘅冠軍雷莊𠒇靚太多太多（上圖）。港姐出身又靚女底，加上依家養尊處優，所以就算生咗女之後，佢都依然fit爆。
唔講真係好多人都以為佢仲未婚未育。加上佢拍戲又幾放得開，就好似喺嚿年重頭劇《金式森林》咁，佢同羅仲謙嗰啲親密戲，真係令觀眾眼前一亮。
新聞女王3，應該有佢㗎喇話說之前拍《新聞女王2》嘅時候，何依婷就去咗生女，只係喺結尾彩蛋現身。仲要係同Man姐佘詩曼對戲，似乎就係為下一輯有所鋪排。
而早前《新聞女王2》慶功宴上，從總監製鍾澍佳，到兩大主角佘詩曼黃宗澤，以及其他要角，都明裏暗裏表示期待第三部。
大家又話睇吓編劇個故事應該點樣繼續，所以有第三部，應該就會有何依婷嘅回歸㗎喇。至於佢係咪拜金或者曬命，
咁就真係冇部份網民講得咁酸，但無可否認佢係真係叻女。尤其係喺事業上升期選擇咗去結婚生女，而唔係衝刺視后，就知道啦。
