by 港產片素來有一個「都市傳說」系列，係指嗰啲拍咗好耐，但遲遲都唔上映嘅電影。其中比較知名嘅就有《尋秦記》、
《風林火山》、《阿龍》，以及可以稱之為「都市傳說之王」嘅《神秘寶藏》。呢部由黃子華、鄭中基、陳法拉主演嘅《神秘寶藏》，2014年已經拍好，
直到11年後嘅今日仲未上映。比起其他幾部「都市傳說」都要早得多，《阿龍》同《風林火山》係2018年拍完，電影版《尋秦記》就係2020年拍完。
所以《神秘寶藏》可謂實至名歸嘅「都市傳說之王」。不過呢部11年前未見天日嘅電影，好快就有機會上映。近日，前任香港電影工作者總會會長，
現任發言人嘅田啟文就表示，呢類「都市傳說」電影即將逐一安排上映。其中最大嘅原因就係依家香港電影業面臨「寒冬」，開戲非常之少，
所以唔少電影公司都會將庫存清一清，回籠資金。於是乎，首當其衝嘅自然就係呢啲知名度高嘅「都市傳說」。睇翻近期嘅報道，又的確係嘅，
比如古天樂已經官宣《尋秦記》2026年初上映；《風林火山》早前康城影展已經試映，年中上映。而鄭中基自導自演嘅《阿龍》原本打算今年4月上映，
點知撞啱佢搞緊離婚，連電影宣傳都做唔到，暫時只能延期。至於有啲電影點解會變成「都市傳說」，田啟文就提到其實原因都有好多。
比較常見嘅原因就係電影要同步內地上映，但攞唔到「嬸pai」，即係攞唔到「lung標」，於是有一大輪嘢要搞。例如送嬸唔過，就要聽取意見剪完重嬸，
如果佢哋換人又要重新嚟過，如果想剪得再靚仔啲又要再重新嚟過等等。所以田啟文都話，好多時候一年半載都唔出奇。佢又以自己監製嘅《阿龍》嚟做例子，
話部戲早就攞到「lung標」，但公司有人建議剪短啲，但剪短咗一樣要重新嚟過。講翻「都市傳說之王」嘅《神秘寶藏》，查實部戲嘅主角原本係古天樂，
不過、由於當時檔期問題要易角，由黃子華頂上。話說當時嘅黃子華仲未擺脫「票房毒藥」稱號，連稍有起色嘅《棟篤特工》、《乜代宗師》都未曾開拍。
而佢就喺戲中飾演一個瘋癲又霸氣嘅開心版張保仔，更自創free style台山話增加喜感。真係電影未上映，就已經有一陣cult片味。
而喺部戲拍完3年後嘅2017年，都曾經傳出要上映，點知始終都係只聞樓梯響。然後唔經唔覺就已經消聲匿跡咗11年。
今次《神秘寶藏》重見天日嘅消息，雖然未有正式官宣，但只要睇吓近年黃子華由「票房毒藥」變成「票房靈藥」——三年三爆嘅《飯戲攻心》、
《毒舌大狀》、《破·地獄》票房接連破紀錄，甚至破億。電影公司又點會唔趁機對呢部倉底貨有所「盤算」呢。同埋田啟文都話「係有聽過片主想搞翻起」，
所以成事嘅機會真係相當大。依家「票房靈藥」氣勢如虹，
順勢而為安排上映絕對係「有貨又有機」。係就快啲喇，部戲未拍之前鄭中基個仔都未出世，依家佢離埋婚個仔都10歲，真係等到頸都長。
