by 相信好多黃子華嘅粉絲近日都好戥偶像開心㗎喇，皆因爆出即將65歲嘅佢終於有拖拍，唔使再做孤家寡人。
點知事隔冇兩日，子華神噚晚就罕有出po澄清拍拖一事並非事實，真係令唔少粉絲空歡喜一場啊。話說近期劉嘉玲就約咗一班舞台劇好友一齊喺佢嘅半山豪宅開P，
同時為9月5日（在當時）即將65歲嘅子華神提前慶生。咁慶祝生日當然就要影翻唔止一張大合照㗎啦，並且一定要「開心些/share」先至為之「禮成」。
所以嘉玲姐隨即就分享咗子華神捧住蛋糕坐正C位嘅大合照，當中都有唔少熟悉嘅面孔，好似蝦頭楊詩敏、潘燦良蘇玉華夫婦等人。
而最令人矚目嘅，就係子華神身後呢個戴住帽、「手抱子華半遮面」嘅神秘女子。如此親暱嘅舉動，即刻就引起傳媒同網民嘅關注，
全部都以為嘉玲姐唔小心洩露咗子華神嘅新戀情，甚至認為係子華神半官宣咁話。喺呢個信奉有圖有真相嘅年代，䁽眼睇、驟眼睇、點樣睇，佢哋都真係似足一對親密情侶嘅。
之後呢個「子華背後的女人」隨即被人起底，原來係同子華神合作過舞台劇嘅演員兼劇團藝術總監黃呈欣。
跟住唔少網民都即刻恭喜佢哋，又話二人都鍾意舞台劇真係相當合拍，甚至仲有人話既然志趣相投就算佢哋「父女戀」都完全冇問題啦。
雖然網上關於黃呈欣嘅資料少之又少，不過推算一下09年畢業於演藝學院嘅佢，年齡應該都係3字尾，如果戀情確有其事都算係「父女戀」嘅。
不過事實係二人只係「父女」並無「戀」，因為子華神澄清話對方份屬好友，之前喺舞台劇中飾演過自己阿女，所以每次見面「都會像父女般互相擁抱」咁話。
既然子華神都親自出面澄清，咁就應該係一場誤會喇，雖然大家都只不過係希望佢有拖拍，唔好咁dry。加上佢最近又未有新作推出，而同Sammi嘅新戲雖然煞科，
但離上映十劃都仲未有一撇，唔至於係電影公司嘅宣傳炒作。唔似得之前TVB開拍新劇《金色森林》咁，無端端炒作60歲嘅郭晉安同劇中阿女、23歲港姐冠軍莊子璇「父女戀」。
講翻子華神，入行多年一直對感情事都相當低調，過往女友亦都一個巴掌數得晒，包括女星潘芳芳、模特兒劉婉君、化妝師溫安妮，以及早幾年嘅圈外短髮女友。
子華神雖然好早就講過自己係不婚主義者，但才子嘅吸引力，試問又如何能擋呢，所以就算65歲有新戀情都好正常啫。之但係點睇今次子華神嘅澄清，都好似係特意澄清自己「襄王無夢」多啲喎。
因為就算係演員或者幾friend都好，邊有幾何阿女會咁樣攬實老窦㗎，仲要係攬實影相，都唔make sense嘅。
難怪有粉絲見到子華神咁樣澄清都留言問佢：可唔可以都叫聲你做老窦，然後畀我攬吓。所以就算「襄王無夢」都好，「神女有心」都唔係完全冇可能，至於另一個可能就係真係拍拖，但意外曝光唯有轉入地下。
不過係唔係都好啦，9月5日就係子華神嘅生日、剛過生日不久，同時早日搵到另一半，助佢搣甩家庭血肉陰影史，然後拉埋天窗啦。
