by 冇人想霉，亦都冇人想一直霉落去，就好似早前開始浪子回頭嘅張致恆咁，日日做咕喱，擔擔抬抬搬貨送貨，
一做就係幾個月。對比翻之前佢同老婆雯雯喺網上請求網民課金，以及每份工都係三分鐘熱度，又的確唔同咗啲嘅。
難得有啲改變嘅佢，早排就接到內地商演登台唱歌，而其中唱嘅一首仲要係昔日拍檔關智斌嘅《眼紅館》。
而近日又有人將佢呢條登台短片加工一番——加上咗「廢柴老公」四隻字，然後擺咗上小某書恥笑一番。
原本張致恆都好投入咁表演嘅，原拍攝者伸手同佢「比心」，佢都好識做咁配合。點知冇偷冇搶搵食啫，竟然被人再摷出嚟恥笑係「廢柴老公」。
而除咗被笑係「廢柴老公」之外，張致恆嘅髮型亦都成為焦點，部分網民就話佢嘅髮型點解咁奇怪，髮線咁高係咪已經冇咗頭髮。
甚至有啲人懷疑佢係咪戴咗假髮，否則點解啲頭髮會咁「硬膠」喐都唔喐吓。不過都有啲人讚佢雖然依家又肥又老、完全變晒樣，
但唱歌依然在線。其實作為一個前歌手，或者爛船都有三斤釘嘅，如果唔係當年英皇都唔會簽佢啦。雖然條路自己揀，仆街唔好喊，
但真係笑還笑，冇必要專登摷翻出嚟再次落井下石，仲要改個新花名。睇翻近期嘅張致恆，自從之前冇錢交租而被業主將佢哋一家六口趕走、
老婆同4個仔要住庇護中心（男人禁入）而要分開後，睇佢個樣應該識驚㗎喇。如果唔係都唔會之後「死做爛做」，一做就係幾個月，努力儲錢重新租屋啦。
既然又肯做又肯捱、又唔偷又唔搶、又唔係變得更衰，都算係咁啦，咪畀條路人哋行囉。
最緊要都係佢願意做又搵到錢，可以令4個無辜嘅小朋友過得更好啫，咁嘅情況之下，正常人都唔會想佢再仆街呀嘛。
廣告贊助商
