by 作為TVB首位四度奪得視后的佘詩曼，深受觀眾喜愛自然不足為奇。不過原來連「最強繼母」蔣祖曼都同樣對阿佘敬佩不已，
近日前更特意發文向她「示愛」。話說兩人因合作《新聞女王2》而結緣的「雙曼」，曾因劇中曖昧情節差點擦出火花，引起網民熱烈討論。
今次她們又在新劇《正義女神》再度合作，趁住TVB即將開播之際，蔣祖曼便在社交平台發長文，大讚阿佘。佢首先話，相信喺每個人嘅生命中，
都會喺「對的時候遇上屬於自己的天使」。而喺佢心目中，天使就係阿佘。阿佘仲要喺一年半前「最恰當」嘅時間出現，亦即係大家開始合作拍劇時。
所以喺佢心目中，阿佘「係癲嘅」，不過佢話鋒一轉，指出係因為阿佘「正到癲。」喂呀，喺娛樂圈邊有一個女藝人咁樣稱讚另一個女藝人㗎，
不過原來蔣祖曼咁講係有原因。事關佢解釋話，自己未識阿佘之前，阿媽已經叫佢「跟阿佘學做人」。至於阿媽點解會咁講，原來係因為阿媽之前一直有睇阿佘嘅專訪，
所以比自己仲熟悉阿佘。尤其係阿佘對工作同玩都極度「專注、執着與堅持」，並且無人能敵，搞到佢諗極都唔明，阿佘點解可以永遠充滿精力。
蔣祖曼繼續話，阿佘教識佢兩樣嘢，一係人生苦短，要愛惜自己；另一個就係做演員一定要真誠，對人對己都一樣。佢仲坦白咁講，如果只係合作《正義女神》，可能會以為阿佘好嚴肅。
但喺拍《新聞女王2》時，就已經發現原來對方好親切。之後蔣祖曼仲話如果一年前自己係唔會出呢啲po，寧願放喺心入面，但阿佘教識佢，時間有限，想講就講，想做就做。
所以佢就借住《正義女神》喺TVB開播前，公開感激「示愛」，要「爽咗先」。雖然一番「示愛」聽落有啲似雞湯，不過對於一個喺娛樂圈浮沉20幾年嘅藝人嚟講，點都有一定道理嘅。
40歲嘅蔣祖曼千禧年出道，因為氣質比較獨立，曾經拍過唔少文藝電影，甚至有「獨立電影女皇」之稱。不過你知啦，呢啲戲頭銜再高都好難紅。
所以後期開始轉型拍電視劇，之後仲簽咗入TVB，有段時間仲劇接劇、做埋女主角，都可以話係捱出頭。而佢之所以被稱為「最強繼母」，係因為佢喺自己21歲起，
就幫任職幕後嘅男友陳卓麒湊大對方同前妻嘅仔仔阿Day。因為阿Day兩歲半時親生阿媽因病離世，蔣祖曼之後就二話不說，犧牲咗二人世界，開始一手一腳落力湊仔。
之後佢同陳卓麒2014年結婚時，仲特意揀咗阿Day生日嗰日去註冊。雖然之後佢生咗親生女可可，不過就一啲都冇偏心，對兩個仔女都一樣咁錫。喺阿Day嚿年18歲成年時，
蔣祖曼仲po咗一大堆母子舊相，感觸表示「你喺我心目中都係最好」，不過又搞笑加咗句「你真係好難湊，湊死我」。喺自己21歲最美好嘅青春年華，
「棉乾絮濕」湊大人哋個仔，仲要完全視如己出，難怪會被網民封佢為「最強繼母」。而「最強繼母」近年都算入屋，憑住《逆天奇案》、《輕·功》、
《法言人》、《法證先鋒VI》等劇成為TVB新一代「御用女強人」。
