by 曾經被封為「TVB童顏女神」嘅孫慧雪，日前喺社交平台分享咗一條收樓短片。片中見到佢同老公一齊去中山坦洲收樓，
仲帶大家參觀主人套房、闊落大廳，以及兩個露台等空間。佢透露，自己買嘅呢間大屋屬於4房2廳，總價唔使200萬，首期更加只需要15萬，
搞到連老公都忍唔住笑佢：「買樓好似買菜咁！」而孫慧雪就笑言：「因為真係好抵呀！」至於點解會選擇去中山買樓，孫慧雪就解釋，
之前曾經去過朋友位於中山嘅屋企一次，之後已經萌生置業念頭。經朋友介紹經紀後，佢一口氣睇咗幾個樓盤，最後更即日落訂，之後仲索性連車位都一齊買埋。
另外，佢亦提到，近幾年自己工作一直好勤力，所以今次買樓其實係送畀自己嘅生日禮物。依家終於正式收樓，等裝修完成後，預計七月生日就可以正式入伙。
正所謂辛苦搵嚟自在食，努力工作賺到錢，當然想獎勵自己。而且以香港收入去中山置業，的確更加「見使」，正如孫慧雪所講——真係好抵！
唔少網民睇完之後都留言表示：「好抵，來回香港又方便。」亦有人提到，黎耀祥等藝人同樣有喺中山置業，認為香港藝人北上大灣區買樓，
似乎已經慢慢成為一種趨勢。講開「童顏女神」孫慧雪，其實除咗童顏之外，「好身材」同樣係佢多年來嘅最大賣點。無論係結婚之前，定係生咗兩個仔之後，身材依然fit到漏。
再加上佢嘅皮膚狀態、五官比例同凍齡外貌，完全睇唔出今年已經43歲。之前佢曾經以校服造型cosplay，更被網民大讚似足大學生，直呼「女神依舊索爆」。
孫慧雪喺2006年入行，當年投考TVB第20期藝員訓練班，同年亦喺節目《美女廚房》中，擔任「粥粉麵飯」四位美女助手之一嘅「飯」。
而呢段時期，亦算係佢早年最令人有印象嘅高光時刻。不過之後好多年，佢大多只係演一啲戲份唔多嘅小角色，例如宮女、助理、店員，
甚至連死屍角色都演過。佢曾經透露，試過企足十幾個鐘拍戲，辛苦到連子宮都出現問題，但即使如此，佢依然冇放棄演藝路。直到2016年，入行10周年之際，
當時34歲嘅孫慧雪突然推出首本寫真集《Once》，憑住火辣身材同曲線美成功引起熱議，更被網民封為「宅男女神」。寫真集推出後人氣急升，
不過成為女神未夠半年，同年，佢就同拍拖6年嘅富二代男友羅天彥拉埋天窗。婚後兩人育有兩個仔，一家四口生活一直低調又幸福。
而孫慧雪婚後亦曾再推出過兩本寫真集，風格依然相當性感火辣，而老公對此亦完全冇Say No，十分支持。雖然樣靚身材正，但孫慧雪入行20年以來，
緋聞其實唔算多，婚後更幾乎零緋聞。2023年約滿後，佢正式離巢TVB，轉型做KOL，同時亦有為隔籬ViuTV主持《美麗40路》等節目，人氣反而有增無減。
當然啦，最令人佩服嘅，始終都係佢生咗兩個仔之後依然完全冇走樣，性感指數仲愈來愈高！
