by TVB熱播劇集《香港探秘地圖》最近幾集，可以話被上位小花、有「嫩版Yoyo」之稱嘅Carmen倪嘉雯搶盡風頭。話說早前一集，
Carmen要一人分飾王秀儀同第二人格「Sa姐」，原本可愛甜美嘅佢突然「秒變臉」，眼神一轉即變得兇狠凌厲。而另一場同亡母對話嘅戲份，佢又演得傷心激動、情緒爆發，投入程度十足。
唔少網民睇完之後即刻洗版式留言大讚：「性格分裂演得好出色！」、「有演技又有觀眾緣！」、「最值得期待嘅新人！」甚至有人搞笑地問：「佢會唔會先係成套劇嘅Big Boss？」
今年30歲、入行七年嘅Carmen，近兩年可謂運勢不俗。年初先奪得台慶頒獎禮「最佳女新人」，最近又成功跨界成為TVB「魔音女團」成員。備受公司力捧嘅佢，
近年陸續獲安排參演多部重頭劇，包括《新聞女王》系列、《正義女神》等，而今次更喺《香港探秘地圖》中首次「升呢」擔任女二角色。入行以來，
她合作過嘅幾乎清一色都係視帝、視后級人馬，除咗有機會近距離偷師之外，佢日前仲自爆從未被前輩責鬧。拍攝《新聞女王》期間，雖然佢大部分時間站喺後排、台詞亦唔算多，
但視后佘詩曼依然主動提點佢演戲技巧：「就算對住我呢啲『小薯』，阿佘都會教我點做、畀好多意見，真係好好嘅前輩。」到咗拍攝《香港探秘地圖》，同視帝黎耀祥合作時，
Carmen更直言完全冇壓力：「祥哥完全零架子，幽默之餘又好照顧我，經常提點我點樣走位。」有次黎耀祥休息期間，佢鼓起勇氣上前請教某場戲應該點演，對方亦毫無保留分享心得。
另外，同劇視后龔嘉欣亦係佢重要嘅學習對象之一。至於今次一人分飾兩角，難度其實唔細。Carmen坦言接到劇本時既興奮又緊張，因為「王秀儀」本身造型太可愛，
所以第二人格一定要令觀眾一眼睇出明顯反差。為此，佢特別喺眼神、跑姿同肢體動作方面下苦功，例如練習外八字跑步、放大手部動作等，令追逐黎耀祥嗰場戲更加有睇頭。
雖然大部分網民都一致讚賞佢嘅表現，但始終亦有部分負評，例如認為佢把聲偏尖，又或者演出略嫌浮誇。對此，Carmen亦大方回應：
「多謝網民提醒，我會努力改善。角色本身好神經質，情緒起伏好大，把聲自然會高咗少少。加上劇集帶有輕喜劇元素，所以我刻意將演繹方式放大，希望令大家睇得開心。」
面對意見能夠虛心接受，EQ相當唔錯，難怪觀眾緣愈來愈好，亦愈來愈多人睇好佢未來發展。其實入行以來，Carmen飾演嘅角色大多比較正面。
佢曾透露，可能同自己做過三年兒童節目主持有關。當時監製十分支持外借佢拍劇，唯一要求係避免飾演殺人犯、小三或者過分性感嘅角色。因此，佢一直穩步累積拍劇經驗。
雖然形象清純，但Carmen強調自己對任何劇種都唔設限，從未試過推掉工作。至於會唔會接受性感演出甚至床戲，佢亦曾大方表示：
「如果導演或者監製覺得我勝任，我絕對樂意挑戰。雖然可能因為身形關係，比較少人搵我行性感路線，但只要劇情需要，我完全接受。」至於現實生活中嘅Carmen，事業心就相當重，
同《香港探秘地圖》中嘅「戀愛腦」角色可謂截然不同。戲內佢飾演極度渴望戀愛嘅A0女生，但現實中嘅佢就自稱係「A1」，即只拍過一次拖，而且入行之後一直保持單身。
佢坦言自己對感情比較佛系同理性，甚至曾向師傅請教感情運勢，而對方就話未來幾年桃花運平平，叫佢專心發展事業。思想比較遲熟嘅佢亦自爆，大學先迎來初戀，
中學時因為媽咪家教甚嚴：「如果我中學拍拖，佢一定會拎住掃帚企喺學校門口，親手將個男仔趕走！」因此，即使當年有男仔追求，佢都一概婉拒。
唔早戀、專心讀書似乎都係好事，因為之後佢成功以優異成績考入香港中文大學生物系。如今事業發展愈來愈順利，拍拖自然唔係首要考慮。
趁住上位黃金期把握機會好好發揮，未來升呢做女一號，相信都只係時間問題。
