by 被稱為「東張女神」的31歲落選港姐王嘉慧，早前再獲網民封為「美腿女神」。因為在TVB年中節目巡禮後，
她於社交平台分享一輯身穿黑色高衩晚裝嘅靚相。相片中、她時而優雅坐低輕托香腮，時而雙腿交疊展現修長美腿，舉手投足散發自信魅力與高雅氣質，成功吸引大批網民關注。
唔少人留言大讚：「世界級靚腿」、「對腳真係不得了」、「呢個坐姿有啲犯規」、「美腿女神果然名不虛傳」等，討論度相當高。
而最近呢位「美腿女神」又有新動向，就係參加香港調解仲裁中心嘅專業調解員資歷認證考試。佢喺IG限時動態分享考試後照片，並簡單寫上：「One exam down」。
畢竟今次屬於較為嚴肅嘅專業進修，所以冇似平時咁分享靚相福利都十分正常。據了解，調解員認證考試要求相當嚴格，學員需要先完成約40小時理論培訓，
內容涵蓋《調解條例》以及替代訴訟糾紛處理機制等課程。調解制度主要透過協商方式協助解決爭議，減少訴訟所帶來嘅對立同成本。完成課程後，學員需通過筆試；
理論部分合格後，仲要接受角色扮演及實務培訓，最後再完成兩個模擬個案認證考核。
完成所有階段並成功通過考試後，先可以成為列席調解員，其後再有資格申請專業會員資格。
王嘉慧今次相信仍處於筆試階段，若順利過關，之後就會正式進入實務演練環節。雖然喺2021年香港小姐競選未能奪冠，但王嘉慧成功打入最後五強，本身亦一直有「學霸」之稱。
佢畢業於傳統名校聖保羅男女中學，其後遠赴英國升學，於倫敦大學修讀心理學，並以一級榮譽成績畢業，更曾登上Dean’s Honours List（院長嘉許名單）。
返港後，佢繼續於香港中文大學修讀法律系碩士課程，期間仲考取健身教練專業資格。如今再挑戰調解員認證，可見佢一直積極增值自己，認真又勤力。
港姐落選後獲TVB賞識簽約嘅王嘉慧，入行以來發展機會一直不少。除咗主持《東張西望》之外，亦曾主持《通靈之王》、《LAW霸女神》等節目；
劇集方面則參演過《新聞女王》、《逆天奇案2》、《黑色月光》、《刑偵12》等多套話題作品。雖然早前積極參與TVB女團「魔音女團」選拔，可惜未能晉身16強，
但佢似乎並冇因此停下腳步，反而持續向唔同專業領域發展，今次報考調解員資格就係最佳例子。另外，作為「內地傢俬大王」王亞明嘅千金，王嘉慧家境相當優渥，亦係團體馬主之一。
據悉，旗下賽駒累積贏得獎金已接近600萬元，可謂事業同家庭背景同樣備受關注。至於感情生活方面，31歲嘅王嘉慧一向十分低調，原來亦係圈中少有嘅長情代表。
據佢透露，現時與從事金融業嘅圈外男友已拍拖超過10年，二人於英國求學時相識，之後一同完成學業，再一齊返港發展。雖然外界眼中佢集美貌、學歷與家境於一身，
但王嘉慧早前曾喺節目中坦言，自己亦曾面對厭食及抑鬱等人生低潮。幸好男朋友一直不離不棄，陪伴佢走過艱難時期。經歷過風雨之後，今日嘅王嘉慧不但事業發展穩步向前，
更持續自我增值，展現出美貌與實力兼備嘅一面。
