by 現年74歲「酒廊歌王」李龍基同37歲佛山未婚妻王青霞（Chris）嘅「爺孫戀」一度成為大灣區熱話。
不過王青霞之前因為涉及逾期居留、用假文書、違反逗留條件工作等7項罪名，最終有5項罪成，被判監25個月。由於王青霞即將於7月7日刑滿出獄，
基哥唔單止事先廣告天下，話會即刻迎娶對方。近日，更被傳媒影到忙於準備家庭生活用品，甚至出動「x情香水」，為重聚嘅甜蜜時刻做足部署。
為咗迎接未婚妻出獄，基哥日前現身深水埗歎茶購物，而所買物品包括內衣、睡衣、床品，一應俱全。期間基哥仲專登行入化妝品店，
請職員幫佢挑選咗一支玫瑰味香水，據知呢支香水仲有x情功效。而基哥就即場快快手埋單，似乎已經迫不及待要展開「新生活」。
呢段相差37年嘅「爺孫戀」，由一開始就已經惹嚟坊間眾多議論。尤其係當年爆出基哥已將所有名下物業轉曬畀Chris，表明自己真心，
又表示對方唔貪心，淨係想簡簡單單拍拖。點知一轉眼，未婚妻就因多項違法問題入獄，令唔少人擔心佢係「人肉提款基」。
不過基哥之後嘅表現就始終如一，更情深款款咁話過：「佢入咗去嘅每一日，我都生不如死，牽腸掛肚，佢出到嚟，我一定要同佢結婚，畀個身份佢留喺香港。」
面對外界嘅一片質疑，基哥依然未有縮沙，之前更大方分享婚後唔會擺酒大搞，反而想同佢阿Chris過啲平淡幸福生活。
佢仲透露，婚後會買車帶老婆遊玩內地，第一站已經鎖定係雲南。然後又話自己以往太忙，冇時間陪對方，今次要補返數：「經過今次呢件事，我哋彼此嘅感情深厚咗，更加珍惜對方。」
而阿Chris喺獄中亦都冇停止向基哥表達愛意，二人每日互相寫信訴心聲。淨係阿Chris寫畀基哥嘅情書已經410封，而每封情書，佢阿Chris都會叫佢做「親愛的老公」。
基哥之前上節目仲拎住呢堆情書笑到見牙唔見眼，仲喺節目上自爆自己身體仲「好有火」。又話平時會做運動保養身體，仲即場做咗30下深蹲嚟證明自己「有心有力」。
今次基哥仲買埋x情香水助興，睇嚟佢呢段時間嘅鍛鍊終於可以派上用場～阿彌陀佛，非禮勿視非禮勿視～
