by 要數現時香港樂壇兩大頂流男神，咁肯定非男團Mirror兩大重要成員姜濤和盧瀚霆莫屬。首先係「紅不過羅湖」嘅姜濤，直至去年為止，
姜濤他所獲得嘅樂壇獎項已經超越陳奕迅、追平張學友（今年1月份，在《2024年度叱咤樂壇流行榜頒獎典禮》上、姜濤憑《好得太過份》奪得「我最喜愛的歌曲」。不說不知道，他在這個叱咤樂壇流行榜頒獎典禮上已五連霸、連續5年奪得該項大獎，超過陳奕迅得到此獎的次數，又榮獲「我最喜愛的男歌手」、第三度封王，同樣的、在這頒獎典禮上獲得此獎項嘅次數，已經追平歌神張學友。果然好得太過份了）。
至於他的好隊友盧瀚霆Anson Lo，在他們自己台Viu TV嚿年嘅頒獎禮，就攞到年度男歌手金獎，摙贏銀獎嘅頂流阿姜濤。但是、千祈唔好講含金量今非昔比呢家嘢啊，
佢哋數量龐大嘅粉絲係絕對唔會承認插水式下降嘅獎項含金量——贏咗就係贏咗！頂流就係頂流！雖然姜濤嘅獎項已經超越歌神，
不過對於今年4月底啱啱開完演唱會、歸位「頂流」嘅謝霆鋒，姜濤就表示要向對方學習。日前佢出席粉絲活動時就表示，
自己最恨拍嘅綜藝節目，就係類似韓國節目《黑白大廚》。佢亦都好坦白咁表示，如果要拍嘅話自己唔係負責煮，而係負責食。
然後姜濤仲伸手做出揸緊拳頭嘅動作，模仿謝霆鋒近日為內地節目《一飯封神》做評判時，用手背試參賽者醬汁嘅動作，令全場爆笑。
咁即係點啊？謝霆鋒呢個動作已經被網民嘲笑既無厘頭又極盡浮誇，阿姜濤係想笑埋一份？定係真係想向「前·真·頂流」致敬學習？
不過點都好啦，學壞容易學好難，如果真係想學謝霆鋒嘅話，起碼要先搣甩嗰浸奶油味，做翻個型男先好喎。至於Anson Lo，佢就真係非常識撈、服務周到。
近日，佢同粉絲單獨互動嘅時候，就有一位芳名為「仙仙」嘅阿姨級粉絲向佢提出過分要求。仙仙阿姨首先係送上一大抽有公仔嘅鎖匙扣，然後盧瀚霆（Anson Lo）就如其所願，同仙仙阿姨十指緊扣。
但正所謂人心不足蛇吞象，仙仙阿姨依然未滿足，佢繼續要求Anson Lo親口同佢講「仙仙我愛你」。大熱天時玩啲咁嘅嘢？真係識玩，起晒雞皮又非常降溫～
之後仙仙阿姨得寸進尺，無厘頭咁問Anson Lo如果買樓想買邊區。被搞到一頭霧水嘅Anson Lo「咦咦哦哦」咗一陣之後就答九龍灣，仙仙阿姨即刻打蛇隨棍上，就話噚日已經喺九龍灣買咗樓。
即係送抽鎖匙就係送層樓咁解，然後仙仙阿姨就向Anson Lo求婚喇，佢話：「你可唔可以娶我啊？」為咗冧掂呢班米飯班主，
Anson Lo唯有勉為其難咁話：「你可以唔可以嫁畀我啊？」嘩，此言一出，你睇仙仙阿姨笑得幾咁開心！原來頂流真係唔易做㗎，一定要服務好，幾驅風嘅說話都要講，唔好有意見。
換轉係你，你都不過係講吓「多謝老細」，之但係如果老細要你講「老細我愛你」、「老細你可以唔可以嫁畀我」，咁你又會點呢？
如果消化唔到就要諗吓，人哋都係出於愛意，並非惡意——咁樣諗，係咪相對啃得落啲。啃得落，咁咪受歡迎囉，受歡迎，咁咪會被一大班粉絲捧為頂流囉，有數可計。
正所謂世上無難事，只要計掂數吖嘛。
