by 雖然依家講起嫁得好，基本上就等於係話男方（屋企）好有錢，但現實中呢個佔比始終唔高。
而且就算幾有錢都好，唔經你手、唔畀你使，甚至覺得你睺住佢（哋）啲錢，咁就真係嫁得好極有限。所以嫁得好唔好呢樣嘢，只要生活唔成問題嘅話，
就真係要睇對方好唔好、對你好唔好。咁樣睇嚟嘅話，連詩雅應該已經搵到。話說早前積極產後復出嘅佢就推出咗全新廣東歌《人生使用說明》，
總結自己「任性嘅前半生」咁話。亦即係話同陳家樂結婚兩年、生女一年後嘅佢，已經正式進入幸福嘅新階段。而講起老公陳家樂，
連詩雅日前上電台受訪時就大爆對方嘅為人，以及自己點解會認定對方係結婚對象。佢話睇唔出樣貌有翻咁上下嘅男仔，
竟然唔係花花公子，反而好純品，甚至好old school。因為陳家樂鍾意夜晚聽住收音機瞓覺，朝早又會飲茶睇報紙，日日食同一款飯都唔會厭。
所以連詩雅話就係被對方呢種特質吸引，自己亦都欣賞對方嘅「傻氣」。而且同其他男人好唔同：「畀到我穩定、同佢一齊好有安全感。」
咁講法，似乎「任性嘅前半生」好有經歷、好有故事喎。咁靚女明星、又係一代女神，多人追梗嘅，其中不乏花花公子或者城中富豪亦都係再正常不過嘅事。
不過，睇嚟陳家樂當然就唔係嗰啲花花公子或者有錢佬㗎喇，再加上以香港狗仔隊嘅本事，以上兩樣都挖唔到出嚟。咁就真係可以話連詩雅嫁得好，
係因為陳家樂真係好、對佢好。而關於對佢好，連詩雅就話陳家樂無論去到邊，都會自動自覺報到，會話到喇，做緊咩咩咩啊。但自己從來都冇話要check住佢，亦都冇叫對方咁做，所以覺得好浪漫。
對於大部分男人都係冇腳嘅雀仔嚟講，自動自覺報到？可能熱戀期或者婚前會咁做吓嘅，持之以恆真係少之又少。
而且二人拍拖嘅時候撞啱疫情，大家相隔異地，陳家樂仲會好有耐性咁同佢facetime食飯、facetime睇同一套戲。雖然陳家樂仲未係大明星，如果要揀一個更有錢嘅男人，以連詩雅嘅條件肯定唔難。
但對於一個自細喺父母離婚嘅破碎家庭成長、情路經歷過唔少波折嘅連詩雅嚟講，陳家樂嘅呢啲安全感可以話係勁有吸引力。
好多女人本嚟就缺乏安全感，加上自身情況，連詩雅又點會唔認定對方可以付託終身呢，佢自己都強調「同佢一齊好有安全感！」 咁當然啦，好多男人都好純品，又可以畀到人安全感，之不過——冇陳家樂咁靚仔囉。
正所謂「返工衛詩雅，返歸連詩雅」，幾純品幾有安全感都好，都恨唔到咁多㗎喇。
