by 話說依家科技進步醫學昌明，女人五六十歲生仔都唔係咩新鮮事。早前就有TVB前藝人黃澤鋒58歲老婆懷上二胎，
不過喺娛樂圈高齡產婦始終都係少之又少。斷估唔到60歲嘅張家輝，日前親口表示61歲嘅老婆關詠荷「就嚟生！」事緣早前渣輝哥罕有咁帶埋老婆一齊去紅館睇演唱會，
捧「香港搖滾之父」夏韶聲嘅場。完騷之後夏爺返入後台時，一眾圈中捧場友人即刻熱烈歡呼。當佢見到荷姐嘅時候，即刻就問︰「你幾時有細路仔？」
荷姐一邊忍住笑一邊正經咁答佢︰「好大喇！」而身邊嘅渣輝哥就即場發揮「化骨龍」本色大聲話︰「就嚟生！」，引嚟眾人哈哈大笑。
原本諗住恭喜渣輝哥，老來得子，可以同19歲阿女張童湊成個好字。點知原來佢只係本色演出。而夏爺聽到荷姐話個女好大之後，都知自己問錯嘢，
於是即兜︰「好大喇？即係你好耐冇見我呀！」想當年90年代早期，夏爺就同荷姐合作拍過TVB處境劇《開心華之里》，當年二人仲係飾演兄妹，有唔少對手戲。
話時話雖然荷姐已經60有1，不過一頭烏黑長髮又以素顏示人嘅佢，面上似乎冇咩皺紋。再加上身材亦都冇走樣，果然保養得宜凍齡有術。
其實今次渣輝哥同老婆夫妻檔現身睇騷又激罕合照，有傳係因為要粉碎網絡謠言。起因係近日有唔少娛樂營銷號造謠佢哋兩公婆離婚，
甚至老作「離婚協議內容曝光」、「婚照被掉到街頭」等等。雖然呢啲造謠冇咩真憑實據，不過依然有唔少人信謠傳謠。
搞到連搜尋引擎嘅關鍵詞只要輸入「關詠荷」，出嚟嘅第一個就係「關詠荷離婚」。查實渣輝哥已經喺好多好多場合，講過好多好多次，好愛好愛佢老婆關詠荷，
又話試過經常發惡夢夢到老婆被財閥撬走，嚇醒自己。依家兩公婆又恩愛合體孖住睇騷，試問又點會失驚無神無啦啦離婚得㗎。
真係信營銷號一成雙目會失明。不過講開又講，信呢啲謠言嘅「失明人士」又的確唔少，就好似早前有傳75歲薛家燕被細17歲嘅男友「呃走2億身家」咁。
搞到家燕姐出席活動都不得不回應並否認，日前佢仲出埋「特此聲明」以正視聽，澄清根本冇咁嘅事。
而令到家燕姐要出聲明咁大件事，睇嚟信謠嘅人真係好多，而且應該唔止信一成，即係起碼有兩成——咁亦即係信營銷號兩成X都變形～
