by 不管是普通人或明星藝人都好，情商（EQ）要高。幾時都話做得明星藝人，就算演藝水平唔高都好，但EQ更加一定要高，否則面對惡意負評，
輕則影響心情，重則容易悒出情緒病。睇吓娛樂圈無分大細星，幾多患上抑鬱症就知係「重災區」，雖然啲鍵盤俠講嘢真係好PK，
但把口生喺人哋度，咁唯有自己EQ高。就好似從TVB出道、過檔亞視紅咗之後，再重返TVB更上一層樓成為視帝嘅陳展鵬咁，佢嘅心態就真係抵讚。
其實、在早前，佢又再一次被網民摷翻呢張舊相出嚟（下圖），留言話好襯佢依家染髮嘅髮色，而呢張舊相一直喺網上都係等同於「成浸亞視味」。
雖然被網民如此陰陽，不過煎pan又冇嬲又冇當睇唔到，反而大方回覆，笑指對方好鍾意呢張相。之後唔少網民都有加入一齊討論（食花生/吃瓜群眾），
陳展鵬其實好用心同網民互動，見到網民重貼佢嘅亞視月曆相，就留言話「睇嚟你好鍾意呢幅相喎，淨係cap我個樣好啦，唔好搞田蕊妮啊好啊😂😂😂」。
有人就大讚佢嘅EQ高，亦都有人指佢終於搣甩嗰浸亞視味。不過煎pan似乎就唔係咁同意呢個搣甩亞視味嘅講法喇，佢認為每個人都有自己行過嘅路，
無論好與壞都係自己嘅，又話因為佢令人記起亞視都係一種情懷咁話。幾時都話，做人最緊要就係「飲水思源」、懂得感恩，煎pan呢個表態就真係相當啱聽喇。
雖然張家輝喺《賭俠1999》嘅搞笑台詞「仆你個街，亞視嚟嘅喂」（下圖）代為道出咗唔少人嘅睇法，仲成為經典金句，不過亞視始終都培養過唔少台前幕後嘅演藝人才。
淨係講過檔TVB嘅都有唔少，除咗煎pan（陳展鵬）和田蕊妮之外，仲有陳煒、江美儀、袁文傑等等，甚至張家輝同關詠荷都係亞視出道。
所以搣唔搣甩嗰浸亞視味又真係唔緊要，識得感恩、識得飲水思源，先至會真正明白咩叫做前事不忘後事之師，而且呢啲亦都係做人應有嘅態度。
話說回來，在早幾年前、《逆天奇案》成為年度收視冠軍劇集的時候，煎pan唔單止冇要求加人工，仲因為疫情嘅關係，
諗住同公司共渡時艱，主動減咗啲人工。除咗煎pan心態好EQ高之外，佢老婆單文柔嘅性格亦都好好，好耐之前喺一個訪問中、就被某個記者故意當面話佢胳肋底出汗。
雖然個記者好衰格，專登想人哋出醜，不過單文柔反而好有禮貌咁多謝個記者嘅提醒，話唔好意思會注意下㗎喇。嗱，呢啲真係唔係一家人就唔入一家門，
兩人EQ都那麽高！陳生（陳展鵬）陳太（單文柔）好嘢！
