by 早年憑著《囍帖街》等歌曲爆紅嘅謝安琪（Kay）曾被視為新一代樂壇小天后。不過華麗背後，佢嘅健康狀況似乎一直有問題。
從2008年第一次「爆肺」入院做手術之後，謝安琪就接連經歷過5次「爆肺」咁多。佢之前坦言，由於肺部狀況長期受損，連帶影響演出表現，搞到佢情緒低落，壓力爆煲。
呢啲「惡性循環」亦都相當麻煩，直接累及歌手嘅事業走下坡。禍不單行嘅係，日前有港媒爆料，謝安琪舊年患上重病，被緊急送入仁安醫院接受手術。
據密友透露，為免親友及粉絲擔心，當時謝安琪同張繼聰都將病情揞到實一實：「好彩手術好順利，總算大步檻過，但其實Kay一直都好擔心會復發，所以都休養咗一段時間，依家情況叫做穩定咗落嚟。」
之後佢又表示，經歷過患難之後，現時兩公婆比以前更加珍惜對方，人前人後都好恩愛。密友又透露，死過翻生之後嘅謝安琪，最希望就係挽回昔日樂壇一姐嘅地位，
所以依家一切密鑼緊鼓。不過理想同現實之間總係有條鴻溝，謝安琪由舊年開始入紙申請紅館檔期。但無論點申請都好，一直被拒絕，紅館亦都從來唔解釋原因。
搞到謝安琪經理人亦曾無奈表示：「我哋每個月都入紙申請紅館嘅，但期未批。」而爆料密友就講得更直白：「Kay一直想再喺紅館開騷，希望靠一個回憶殺挽回樂壇地位。」
不過、紅館管理層就點都唔批，團隊屢試屢敗，依家等緊11月個期，但其實都申請到冇曬心機。一家獨大嘅紅館似乎一直都係如此「黑箱操作」，好多知名歌手申請過無數次，都係唔批又冇原因。
包括楊千嬅之前都申請咗8次先至成功開到演唱會。講返謝安琪，一直申請唔到紅館開騷，無奈之下，佢決定另闢蹊徑——宣佈同老公張繼聰聯手，以夫妻檔嘅形式開騷。
二人嘅演唱會《The Duality 一念雙生》將於6月14日喺澳門舉行，係佢哋入行以嚟首次夫妻檔同臺。密友仲爆料：「阿聰依家嘅號召力明顯比老婆高一線，所以Kay想重振聲威，梗係要拉埋老公落水，用夫妻檔做gimmick(噱頭)。」
之後密友又表示，謝安琪經歷過大病之後，佢哋兩公婆亦都好想有一個夫妻檔嘅騷嚟做紀念。其實，近期謝安琪亦都積極籌備緊新專輯。
包括早前推出嘅20週年紀錄歌曲《50/50》，更破天荒請嚟老公好友黃子華做MV主角（下圖）。兩年幾冇出新歌，一出就碌爆人情卡，睇嚟謝安琪重振樂壇地位嘅信心都相當十足。
雖然爆料報道就講到「實牙實齒」，不過張繼聰日前出席活動時開腔澄清。佢話謝安琪根本冇做手術：「太太之前腸胃炎同爆微絲血管，我就有椎間盤突出癥去照過，出入醫院都好正常，冇做手術，唔使擔心。」
之後佢又指出，謝安琪肺部係比較差，以前成日爆肺，又中過流感，咳容易聲帶受損，影響唱歌聲沙。所以最近幾年已經跟唱歌老師學習發聲，鍛煉新唱法。
至於48歲嘅謝安琪被指要再爭樂壇一姐之位，佢就澄清冇咁嘅事：「佢好多年前己經係第一，依家做音樂為享受，做想做嘅歌，開音樂會係多謝歌迷。」
「太太冇諗過要做天下第一，做天下第一開心和健康就夠。」又係嘅，2008年謝安琪一首《囍帖街》已經風頭無兩。成為獲獎最多嘅廣東歌，統計歌曲及創作者獎項，一共獲獎超過28次。
亦係迄今為止，第三首亦係最後一首，能夠全數奪得香港四大傳媒年度最佳金曲獎嘅歌。（第一首係94年黎明《那有一天不想妳》，第二首係06年古巨基《愛得太遲》）
成績如此驕人，難怪被評為千禧年間香港樂壇經典之一。
