by 一般被人騙，都唔係一件簡單嘅事，如果被人呃過百萬，只會更加複雜。而呢件事，就要先從知名港產網劇《反黑》講起。
話說《反黑》第一季喺2017年上架後人氣爆棚。全球串流播放量超過50億，堪稱港產劇集奇蹟之一。導演宋本中見勢頭咁勁，喺2023年底就高調宣布開拍第二季。
仲要將劇集升級到60集，更拉埋謝天華、陳瀅加盟，號稱總投資高達2億港元。喺呢個宣傳勢頭之下，《反黑》系列一度被視為「港劇復興代表作」。
但好景不常，《反黑2》喺舊年4月突然停拍，官方對外宣稱只係因為資金鏈斷裂。早前宋本中就現身社交平臺，拍咗一條名為《拯救反黑大行動》的短片。
他訴苦話，原本講好投資嘅澳門金主臨陣退縮，另一投資者邵氏嘅1000萬只夠拍幾日。佢表示自己目前已經走投無路，希望眾籌400萬救亡。
不過條片出街之後反應冷淡，最終只係籌到3.2萬，支持者唔夠50人。但因為宋本中拍片眾籌，反而令到唔少網民紛紛指出佢嘅眾籌「有問題」。例如點解只係眾籌400萬咁少，又話拍劇起碼過億，400萬根本係杯水車薪。
之後又有網民踢爆宋本中喺圈中嘅為人，例如話佢老寸、過橋抽板等等。而最嚴重、「愈揭愈臭」嘅係，多名網民爆料指出：
「劇組帳目混亂、投資者臨時走數、連基本製作人員出糧都出唔齊。」其中最慘嘅係一班幕後人員，被拖糧超過90萬，攝影、燈光、美術等統統中招，幾乎變咗一場「行騙式開戲」（下圖：宋本中）。
之後宋本中嘅眾籌計劃以及相關短片，亦都隨即不知不覺下架，社交帳號暫無交代。不過對於呢場「大龍鳳」，最尷尬嘅，可能就係第一季主演之一嘅李燦森（現名李璨琛）！
據報導，李燦森唔止係劇中嘅演員，仲係投資者之一。有傳佢當年豪擲七位數支持《反黑》，希望搞好港產劇集。但之後就被爆出資金無影無蹤，
甚至連自己嗰份片酬都追唔齊。因為宋本中呢次「賣慘眾籌」事件，於是又將李燦森「被呃」過百萬呢件事推上風口浪尖。
李燦森日前受訪時就話，《反黑》第一季對佢嚟講已經係一個完成項目，2017年之後就冇再同宋本中聯絡。所以佢唔清楚嗰邊嘅情況，亦都冇留意《反黑》之後嘅發展。
李燦森又強調，件事已經過咗咁耐，如果要講，都唔係等佢依家咁困難先至講。最後佢又表示：「總算相識一場，祝佢好運！」聽落真係既無奈又欲言又止，
而最後一句「相識一場祝佢好運」都可以話係有情有義。善哉善哉！另外，對於有份投資嘅邵氏電影，高層樂易玲日前出席活動被問到係咪「所託非人」時（下圖：樂易玲）。
她就含蓄咁表示：「咁都要畀機會佢搵其他投資者嘅。」至於導演宋本中方面，目前就繼續神龍見首不見尾，
所以最後會唔會變成「羅生門」尚不得而知。其實喺娛樂圈入面，「錯信人」呢樣嘢，李燦森都唔係第一個。從投資拍戲嘅角度嚟睇，從來都係高風險遊戲。
不過幾高風險都好，最難防嘅都係：你當佢兄弟，佢當你契弟～
