by 又到一年尾聲，娛樂圈亦步入年度總結時刻，各大頒獎禮陸續揭曉入圍名單。不久前，TVB正式公布「2025台慶頒獎禮」各項獎項之候選名單。
雖然獎項種類繁多、入圍名單龐雜，但對大多數TVB忠實觀眾而言，最關注、最期待的，始終是以下幾項核心大獎：最佳劇集、最佳男／女配角，
以及萬眾矚目的最佳男主角（視帝）與最佳女主角（視后）。先講最佳劇集，其實應該都冇咩懸念㗎喇，以大大大熱姿態回歸嘅台慶重頭劇
《新聞女王2》攞獎嘅機率肯定係最大。雖然內地平台已經播完，但TVB依家先播到近尾聲，距離2026年1月4日舉行嘅台慶頒獎禮喺時間上最近，所以熱度肯定係最高。
當然，一套好劇集並唔係在於時間上近水樓臺先得月，不過仲有熱度點都係一個優勢。喺劇本方面，行爽劇快節奏嘅《新聞女王2》的確唔弱，
如果非要搵一兩個競爭對手，大概就係《金式森林》同《巨塔之后》。而喺最佳男女配角方面，先睇吓入圍者嘅重複提名數量，雖然演技嘅嘢都係以質取勝，
但提名數量亦係TVB力捧嘅對象，如果唔係邊有咁多劇拍。最佳男配角方面，朱敏瀚、黃庭鋒、丁子朗同吳業坤都有3項提名，其中朱敏瀚仲獲得2項男主角提名。
不過想攞視帝應該都冇咩機會㗎喇，喺男配角方面應該仲有啲機。但男配角方面有咁多老戲骨入圍，如果最後係新一輩藝人攞獎，咁實至名歸呢樣嘢又真係要先打個問號喇。
而喺最佳女配角方面似乎就冇咁複雜，因為喺兩套重頭劇《金式森林》同《新聞女王2》都飾演「方太」嘅龔慈恩演技真係相當出眾。
同時網民對佢攞最佳女配角嘅呼聲亦都相當高。當然，仲有其他入圍嘅最佳女配角都唔差，劉佩玥總共有4項提名，其中2項仲要係女主角。
另外，陳曉華、王敏奕、高海寧，亦都有一套以上嘅重頭劇加持，都有得爭。嚟到視帝方面，今年嘅競爭絕對激烈，基本上都係視帝、多屆視帝之爭。
例如有三屆視帝郭晉安，基本上可以話係以一人之力孭起成套《金式森林》。而兩屆視帝陳豪，就以兩套劇《執法者們》同《俠醫》入圍，
觀眾緣極好嘅佢，又號稱係TVB吸金王，好有機。至於相隔14年再回娘家拍劇嘅《金枝慾孽》視帝林保怡，喺《刑偵12》中飾演患有人格解離嘅丁Sir，
由佢一人分飾N個角色性格，演技真係冇得頂。不過可惜演技更勝一籌嘅佢，係外援。最後一個有競爭力嘅就係大灣區視帝黃宗澤，
雖然佢就未真正攞過TVB視帝，但好多網民都話TVB欠佢一個視帝。今次佢仲以兩套重頭劇《執法者們》同《新聞女王2》嘅男主角入圍，演技同顏值在線。
如果TVB想趁呢個機會力捧一位年紀未過50嘅中生代視帝，同時開拓內地市場，咁黃宗澤就真係好大機會「坐定粒六」。
最後嘅最後就係視后之爭，《新聞女王》都話考慮緊拍第三輯，又確定咗會開拍高海寧嘅「許詩晴外傳」。所以TVB近年呢個最大嘅IP，風頭真係一時無兩，
而且最重要嘅係佘詩曼嘅演技又好又穩定，好多嘢一個眼神就已經演晒。再加上人氣、話題、廣告全部都高高高，再憑Man姐「冧莊」多一次視后，基本上都十拿九穩㗎喇。
之不過另一個大熱視后宣萱都唔弱，以兩套重頭劇《執法者們》同《巨塔之后》入圍。而《巨塔之后》同《新聞女王2》一樣都係「大女主」劇集，
除開劇情外宣萱嘅演技亦都不相伯仲，所以佢都仲係有機。雖然分析還分析，但好多嘢去到最後都係公司嘅高層博弈以及利益計算。
所以頒畀邊個都好，係唔係實至名歸都好，點講都係公司當時當刻嘅最優選項。
