by 不知不覺、「安心事件」已經過去咗6年。6年嚟好多人都開始唔記得咗呢件事，而第一受害者Sammi鄭秀文亦都早已選擇原諒老公許志安。
甚至為咗表示信任同支持，逢親開演唱會，都會婦唱夫隨，帶埋許志安上台合唱。而另一個受害人馬國明，亦都喺前年同湯洛雯拉埋天窗。
至於事件嘅男主角許志安，今年可以話終於正式復出，嚟緊嘅8月將會以組合Big Four成員之名，喺紅館舉行3場演唱會。
喺試水溫嘅呢幾年，許志安雖然都有講過懺悔嘅說話，不過次數真係屈指可數。而事件嘅女主角黃心穎就完全唔同喇！
只要你睇到佢嘅新聞，幾乎每次都會消費一下「安心事件」——唔係賣後悔，就係賣痛苦，或者賣雞湯～好似「安心事件」已經成為佢嘅光環一樣。
近日，黃心穎就現身中環街頭Busking，為佢嘅第4首個人單曲《看透世間美事》宣傳造勢。佢話呢次演出係復出之後嘅第一次公開面對群眾，所以好緊張又好難忘。
然之後，佢就開始「賣雞湯」、第N次消費「安心事件」，佢直言街頭Busking係為咗戰勝心魔。佢好開心自己終於做到，係「又一次戰勝了另一個恐懼」咁話。
吓？黃心穎恐懼？佢恐懼就唔會一邊同Sammi做friend，一邊搭上許志安啦。再講，作為2012年港姐亞軍，著過無數次泳裝出鏡及上台，佢恐懼啲咩啊。
再再講，佢亦都出過好幾首單曲，喺更多人嘅場合都表演過，區區一個Busking就會恐懼？莫非佢嘅恐懼係驚有人向佢掟臭雞蛋？
反正哩，佢口中所講嘅「恐懼」或明或暗都係引導、提醒大眾返翻「安心事件」上面。甚至營造出自己最終都係受害者嘅觀感——係啊，我要復出、我都好難、我都好驚、我有心理創傷～㗎。
對於一個好勝又唔認輸嘅人，呢啲心機其實好容易睇穿。就好似之前傳媒爆出馬國明計劃結婚嘅時候，有人即刻唔執輸，自爆結婚然後爬頭。
其實2023年宣佈復出之後嘅黃心穎，就先後多次以「從低谷中走出」作為包裝主題。無論係為新歌宣傳，定係接受訪問，無不加入賣懺悔、賣慘情、賣雞湯等等。
不過，她每次畀人嘅感覺都唔係咁誠懇，反而似係重複又重複消費「安心事件」，同時建立同為最終受害者人設。呢招嘅綠茶含量都幾高㗎，
只要你不停咁同傳媒講：自己幾咁後悔、幾咁痛苦、幾咁難以走出嚟，慢慢就會獲得同情。如果真係咁辛苦，電視劇都有教啦，第一時間就要搵身邊嘅朋友好好傾訴。
唔通經過「安心事件」之後佢冇晒朋友？不過佢仲有3個家姐1個老公喎。而作為家中嘅孻女孻心肝，備受家人溺愛，
似乎又印證翻佢好勝同唔認輸嘅性格。講真的、如果黃心穎真係誠懇嘅，早就好似嗰個自稱「壞咗嘅人」一樣開記招道歉，尤其係向Sammi道歉。不過、黃心穎冇。
反而係宣佈復出接受訪問時，先至話係公司唔畀佢咁做，推得一乾二淨之餘，復出亦有話題。另外，為咗宣傳單曲《I Sleep》，
黃心穎終於解答咗一個大家一直好關心嘅問題——有冇同Sammi道歉？佢喺宣傳嘅時候就首次承認曾經私下向Sammi道歉，但就冇提具體內容。
冇錯，重點係「宣傳新歌嘅時候講」。而佢近日所推出嘅呢首單曲《看透世間美事》，歌詞亦都充滿了「贖罪」、
「內疚」、「被審判」等等情緒元素。完美咁又一次消費「安心事件」，同時再一次向Sammi傷口灑鹽。對於過了六年後的「安心事件」、你怎麼看？歡迎留言。
