by 擁有42吋長腿嘅TVB前小花沈卓盈，日前喺社交平台分享近況，透露自己生日雖然已經過咗個半月，但期間先後患上急性肺炎同急性腸胃炎，
令佢痛苦到形容自己「來回地獄又折返人間」。佢表示，患病期間咳到連氣都唞唔到，食藥食到偷偷喊，又因為不停肚瀉搞到全身冇力，甚至連拎起一杯水都覺得困難。
嗰種死去活來嘅感覺，令佢深深體會到健康先係人生最重要嘅財富。嫁入豪門後嘅沈卓盈，一向都好重視生日儀式感，所以今年雖然病過一場，
但生日慶祝活動依然一浪接一浪。先有老公同囝囝陪佢享用生日大餐，之後好姊妹徐菁遙同陳自瑤又特別安排Spa，以及到中環米芝蓮二星法國餐廳為佢慶生。
不過即使身體一度抱恙，沈卓盈嘅精神狀態依然相當唔錯，樣貌同身材保養得宜，凍齡感十足，完全睇唔出已經44歲。雖然近年已經淡出幕前，但沈卓盈仍然活躍於社交平台，
不時分享幸福家庭生活，同時大方派福利。無論係背心、熱褲、短裙定Deep V造型，都輪流登場，當然亦少不了展示少奶奶生活，包括Hermès、Chanel等名牌手袋鞋履，以及出入高級場所嘅日常。
除咗保養得好之外，佢嘅笑容亦相當自然，畀人一種親切又吸引嘅感覺，觀眾緣始終都仲喺度。2002年憑《TVB週刊》「Cover Girl」冠軍入行嘅沈卓盈，初期以主持工作為主，
其中《最緊要正字》令唔少觀眾開始認識佢。之後轉戰劇集發展，喺《古靈精探B》中飾演「Icy姐姐」，憑住討喜角色加上一雙修長美腿，被網民封為「長腿女神」。
雖然當年喺TVB大多數時間都係飾演配角，但佢清新之中帶點性感嘅形象，一直都深受觀眾歡迎。感情生活方面，沈卓盈早年曾先後與幾位富二代拍拖，因此一直都有唔少話題。
2019年曾有雜誌以「正職釣金龜」形容佢，甚至暗示佢靠男人脫貧。報道刊出後即時惹怒沈卓盈，佢更公開反擊表示：「如果只求釣金龜，我一早成功咗，仲使捱咩？請停止侮辱我人格同摧毀我清譽！」
當時佢亦強調，自己一直默默耕耘、努力工作、自力更生，只希望找到一位真心愛自己、珍惜自己嘅另一半，共同組織家庭。事件之後亦成為沈卓盈其中一個較具爭議性嘅話題，
雖然網民意見兩極，但都睇得出佢性格相當直率。2019年，沈卓盈與家族經營內衣褲出口生意嘅富貴男友杜灝標，低調於布吉舉行婚禮，婚後正式晉身貴婦行列。
其後誕下兒子Jayden，亦逐漸減少幕前工作，專心相夫教子，享受家庭生活。不過，就算做少奶奶都有少奶奶嘅煩惱。沈卓盈早前曾分享，湊仔頭幾年曾經歷育兒焦慮同精神內耗，
直到近年囝囝逐漸長大，佢先慢慢學識調節自己嘅心態，提醒自己要重視健康同生活平衡。又係嘅，就算屋企有幾十個工人，有時做父母始終都唔想事事假手於人。
或者呢啲就係古語有云：「養兒一百歲，長憂九十九」啦！
