by 曾經喺周星馳經典電影《九品芝麻官》中飾演「李蓮英公公」而深入民心嘅京劇及粵劇大師劉洵，5月29日安詳離世，享年87歲。
佢嘅摯友兼學生羅家英5月30日凌晨、喺社交平台發長文證實消息，字裡行間盡是不捨與感恩。劉洵自幼學習京劇，師承多位京劇名家，1958年畢業於中國戲曲學校，之後成為中國京劇院演員。
1980年隨團來港演出，並於1982年與太太定居香港，先後於香港舞蹈團及香港演藝學院任教，對粵劇及戲曲藝術傳承貢獻良多。
羅家英、汪明荃等多位名伶都曾跟隨劉洵學藝。羅家英更直言，自己後半生嘅藝術成就得以「脫胎換骨」，全賴劉老師悉心栽培。佢又透露，即使近十年劉老師身體日漸轉弱，
仍然堅持提攜後輩，直至生命最後階段。劉洵47歲先正式涉足電影圈，當年獲徐克賞識，參與《刀馬旦》嘅戲曲指導及演出，其後憑藉千變萬化嘅演技，獲封「千面如來」美譽。
代表角色包括《笑傲江湖》中陰險狠辣嘅東廠公公古金福、《黃飛鴻》系列中嘅劉永福及黃麒英，以及最令觀眾難忘、喺1994年《九品芝麻官》中與周星馳精彩對戲嘅李蓮英李公公。
當中一句：「你好大嘅官威呀！包大人！若果再畀你做多兩年官，恐怕連老佛爺都唔放在眼內呀！」
更成為家傳戶曉嘅經典對白，至今仍被影迷津津樂道。2021年，劉洵以82歲高齡獲香港演藝學院頒授榮譽院士，以表揚佢多年來對演藝及戲曲界嘅卓越貢獻。
一代戲曲大師殞落，令人惋惜。
劉老師，一路走好。
廣告贊助商
