by 有「翻版方媛」之稱嘅TVB上位小花陳星妤，最近再次成為焦點。日前她飛到非洲贊比亞，挑戰世界三大瀑布之一嘅維多利亞瀑布，
更親身到訪驚險聞名嘅「魔鬼池」。陳星妤身穿比堅尼坐喺激流崖邊大晒好身材，白滑肌膚同湍急瀑布形成強烈對比，身後更係萬丈深谷，畫面相當震撼。
之後佢仲落水喺懸崖邊暢泳，刺激程度再升級，令唔少網民睇到心驚膽跳，紛紛留言：「好驚呀！打卡都要咁玩命？」「咁近瀑布真係要小心！」、「條女真係夠膽！」
面對網民擔心，陳星妤之後亦親自留言解釋，透露當時其實有兩個人拉住佢雙腳，全程做足安全措施，並非毫無保護地冒險。雖然虛驚一場，但都難怪大家睇到捏一把冷汗。
陳星妤於2021年以「陳聖瑜」之名參選香港小姐而入行，當年被視為熱門佳麗之一，可惜最終止步八強。不過憑住「翻版方媛」及「理大吳千語」稱號，
加上出眾外形，落選後即獲TVB賞識簽約。畢業於香港理工大學設計系嘅佢，學生時期已兼職擔任模特兒。加入TVB後發展不俗，其中最令人印象深刻嘅角色，
莫過於2023年劇集《一舞傾城》中飾演「最後處女」KK一角。憑住大膽戲份同話題性劇情，成功打開知名度。其後佢陸續參演《法證先鋒VI：
倖存者的救贖》、《廉政行動2024》等作品，近年亦有份演出《執法者們》及《金式森林》，演藝事業穩步發展。雖然近半年未有新劇播出，但陳星妤生活依然精彩，
經常周遊列國，滑雪、浸溫泉、歐洲旅行樣樣齊，近日更升級到非洲Safari級別打卡。加上頻頻以名牌造型示人，令公屋出身嘅佢開始引起網民熱議，
甚至出現「忽然富貴」及收入來源相關猜測。對於外界議論，陳星妤似乎毫不介意，仲笑言呢啲都算係「另類宣傳」，繼續過自己想要嘅生活，
懶理流言蜚語。至於感情生活方面，陳星妤一直保持低調。雖然不時傳出有富貴男友支持，但佢始終未有正面回應，
強調現階段以事業為先。既然當事人都唔願多講，網民又何必太過深究？正所謂財來自有方，有靚相同福利睇，已經夠晒吸睛啦！
