by 一般來說、若60幾歲，對於好多女性嚟講早就已經退咗休、享緊福、湊緊孫，最大嘅運動量可能就係落樓跳吓廣場舞。
但喺娛樂圈，「登陸」都只不過係明星藝人演藝生涯嘅中年延續。或者話對佢哋嚟講，從樣貌、身材到狀態，都唔存在呢一條「登陸線」。
就好似日前孖住老公林子祥、以夫妻檔身分喺紅館開騷嘅葉蒨文咁，成晚喺舞台上跳跳紮。除咗一頭銀髮之外，真係完全睇唔出佢已經64歲。
你睇佢皮膚仲keep得咁好，條腰仲fit過廣州嘅小蠻腰。如果唔係葉蒨文親口講過堅持唔整容唔染髮、自然老去嘅話，染翻黑髮話佢50出頭都大把人信。
當然啦，最重要嘅肯定都係心態，心態好狀態自然好。睇佢喺台上全程投入、又唱又跳、面不改容、毫不氣喘，絕對可以話係「老阿姨嘅天花板」。
講真的，換轉後生嘅都未必可以又唱又跳咁耐啦，例如阿香港頂流跳隻舞都會喘晒大氣。所以葉蒨文呢啲先係真正嘅樂壇唱家班，寶刀未老啊！
咁講到寶刀未老，當然唔少得77歲嘅林子祥啦，雖然後生時佢就已經行「中佬路線」，咁多年嚟大家都唔覺得佢「變得更老」。而同時未有變得更老嘅，
仲有佢實力依舊、中氣十足嘅歌喉。眾所周知佢哋兩公婆嘅作品向來高難度，依家兩個加埋141歲，但年齡真係唔係問題。睇吓佢哋仲keep到咁好又充滿活力，
就知佢哋有幾咁犀利啦。而且好重要嘅一點就係，大家都完完全全感受到佢哋好熱愛呢個舞台、好享受呢個表演。正正就係呢一份熱愛同享受嘅感染力，
並唔係任何歌手都可以做到。呢啲咪就係殿堂級歌手嘅實力囉！所以難怪依家啲所謂頂流歌手會令咁多人對樂壇一再失望，
真係有啲劣幣驅逐良幣嘅即視感～
廣告贊助商
