by 最近TVB嘅戀愛綜藝節目《女神配對計劃》真係好hit。除咗成為大臺嘅收視王牌之外，亦都係唔少網民嘅討論熱點。
其中最吸睛最有話題嘅，當然就係螢幕CP葉蒨文同曾展望。但正所謂鹹魚白菜各有所愛，其他「戀綜女神」一樣有人愛。
就好似被John哥姜大衛阿仔「細John」姜卓文愛上嘅女神關嘉敏，近期亦都成為熱門話題之一。不過人紅是非多，上緊位嘅關嘉敏，
日前又被挖出幾年前由ViuTV跳槽到TVB嘅舊聞——鬧佢為人反骨！日前佢就接受電臺訪問，親自為所謂嘅「反骨」解畫，講述入行以嚟嘅辛酸。
雖然依家31歲嘅關嘉敏，仲係被視為「TVB小花」，不過查實佢入行差唔多10年。2016年佢以女團Bingo身分出道，
不過樂壇不景氣，做咗4年「無名歌手」完全賺唔到錢，仲要倒貼6位數。佢日前接受電臺訪問時仲話，曾經試過糧單只有8豪子！
皆因多數演出都係只有車馬費，仲要女團5人平分。陰功豬！睇嚟「追夢」呢家嘢仲浮誇過海鮮價，的確好貴，又真係好平——8毫子。
不過天無絕人之路，2020年佢以個人身分參加ViuTV嘅選秀節目《全民造星3》反而一舉成名。雖然只係20強止步，但表現出色嘅佢開始多咗好多job，
接咗好多廣告，最犀利一個禮拜有三個廣告出街。可以話係ViuTV呢個平臺成功幫佢扭轉逆境。不過好多人都「估佢唔到」嘅係，
第二年佢就轉投TVB，點知咁就出事喇。眾所周知ViuTV除咗「香港頂流」多之外，後生觀眾亦都好多，個個熟悉上網大把意見。
所以當關嘉敏轉會消息傳出之後，即刻遭致無數網絡負評，通通鬧佢——反骨、無情、忘恩負義！由於網上負評不斷，唔少合作單位唯有暫停同佢合作，
導致佢廣告被cut、事業被煞停。佢日前受訪時就話，當時自己日日以淚洗面，「匿埋屋企喊足三日三夜」。又覺得自己所有努力都白費曬，所有支持過自己嘅人亦都冇曬。
而佢覺得最難頂嘅，就係被人鬧反骨！雖然件事過咗好幾年，不過講起嘅時候關嘉敏依然眼泛淚光。依家終於叫做上到位，有機會接受專訪，佢終於可以將委屈解釋出嚟。
佢話自己當時已經出道，有經理人，而ViuTV係絕對唔會簽呢啲藝人。言下之意，就係節目完咗就真係完咗，亦即係ViuTV無非都係搵啲有才藝嘅「半新人」嚟撐場。
嚴格嚟講，呢啲其實係妳情我願各取所需，妳有機會提高知名度，我又可以提升節目觀賞度。然後合作關係結束，各自安好，又真係講唔上「反骨」嘅。
不過關嘉敏都覺得嗰時轉會，可能唔係一個「good timing」，所以容易被人鬧爆。入咗TVB捱咗幾年閒角後，佢終於喺舊年《福祿壽訓練學院》中模仿「中2生」譚輝智而彈起。
依家又升呢成為「戀綜女神」，仲要出埋新歌再做歌手𠻹，都叫捱出頭啦。至於之前被鬧反骨，查實又真係唔使道德審判嘅。
畢竟當時只係參加ViuTV節目，而人哋又冇話留用又冇話簽約，之後有更好平臺當然人往高處。如果過檔真係有問題嘅話，以兩個臺針鋒相對水火不容嘅關係，佢早就做咗炮灰啦。
今時今日仲點會有機會做到戀綜女神呢。
