by 最近因為舊愛李泳豪嘅家事風波，意外再次成為話題人物嘅六料港姐冠軍楊思琦，喺捱鬧15年之後，似乎終於有種「沉冤得雪」嘅感覺。
之後又再牽扯出一段疑似被前輩大姐大帶頭「集體欺凌」嘅拍戲舊事，令佢一時間成為外界焦點。近日楊思琦出席某汽車品牌活動時，自然再度成為傳媒追訪對象，
除咗即場買車做車主，仲霸氣回應咗一連串關於「神祕老公」嘅傳聞。活動現場見到佢心情相當唔錯，仲透露自己以優惠價購入新車，而同「神祕老公」所生嘅囝囝Kody都有份幫手揀車兼畀意見。
之後佢又笑言自己係屋企嘅「柴可夫」，平時主要負責接送家人，畀人感覺係個相當顧家嘅好媽媽兼好老婆。當記者問到幾時會換大屋時，佢就笑笑口回應：「承大家貴言。」
隨後話題自然轉到佢嘅身家同老公身上。有記者問佢係咪坐擁5個物業、身家高達半億？楊思琦即刻避重就輕，但亦冇正面否認，
只係表示：「我都唔知，默默努力工作啦。」不過佢亦提到，之前曾有人傳佢一個月賺幾百萬，對此佢就當場否認，強調絕對唔係事實，仲話自己只屬於小康之家，認為大家太抬舉佢。
至於點解自己一直咁努力工作，甚至深夜直播，佢就坦言只係想家人生活得舒服啲，因為屋企有唔少開支，所以先會不停開工做直播。
講到最受關注嘅「神祕老公」，楊思琦今次就冇再左閃右避，不過回應依然相當低調，只係簡單表示：「大家財政獨立，我由細到大都好獨立。」
當記者追問老公有冇幫手分擔時，佢就話冇需要特別講明，並表示屋企人同老公當然都係自己嘅依靠，但唔需要對方畀幾多offer，又或者送幾多禮物同車畀自己。
當有記者笑住話：「叫老公送架車畀你啦！」佢即刻霸氣回應：「使乜人送？自己買，我係女強人。」至於點解一直冇人見過佢老公真身，究竟仲要「收埋」到幾時？
楊思琦亦有補充，話一切順其自然，強調自己並非刻意隱藏：「大家見到咪見到囉。」對於坊間一直傳佢根本冇老公，佢就再次強調其實一直都有，
只不過對方係圈外素人，希望大家畀多啲空間：「佢有佢工作，我有我打拚。」不過記者依然鍥而不捨，笑問點解一直都冇人影到佢老公個樣，真係極度神秘。
思琦妹就繼續面帶笑容回應：「睇吓呢個紀錄可以維持幾耐，我哋都係正常生活，大家唔使太好奇，我係思琦！」雖然個gag有少少冷，但不得不承認，思琦妹今次嘅EQ的確高咗唔少。
另外，喺今次活動上，佢亦有回應早前喺伍詠薇節目中，被爆曾遭前輩大姐大帶頭欺凌一事。楊思琦表示，自己事前其實唔知道節目會問到相關問題，
之後又話自己係一個「冇乜記性」嘅人，認為唔開心嘅事最好就唔好記住。至於網民近日「實牙實齒」推測，懷疑當年帶頭欺凌佢嘅前輩大姐大係商天娥，
楊思琦就始終唔肯正面澄清，只係低調表示唔想再多講，因為已經講得太多：「係唔係佢都唔會講！」不過呢句說話一出，反而令網民更加議論紛紛。
究竟係咪真係已經「間接答咗」？相信大家都只能自行的去判斷了。歡迎留言～
