by 63歲嘅一代大俠、無綫五虎將之一嘅黃日華，最近幾年都好少喺幕前露面。
不過日前佢就接受前港姐冠軍李珊珊嘅網臺專訪，仲罕有咁喺鏡頭前流下男兒淚。正所謂男兒有淚不輕彈，只因未到傷心處，
華哥都係因為講起2020年離世嘅太太梁潔華。華哥同太太婚姻美滿，而外界亦一直視佢為「娛樂圈愛妻號」嘅代表人物。
之前太太患上急性骨髓性白血病期間，華哥每日都會喺醫院全程陪伴——唔見朋友，唔接劇唔接戲，一切以太太為先。
佢話：「嗰陣唔會諗咁多嘢，全心全意照顧太太。」李珊珊就大讚華哥係一個好男人。但佢就謙虛表示：「咁佢始終係我老婆，係自己揀返嚟，一定要愛錫佢。」
可惜命運無情，摯愛最終敵不過病魔，太太離開之後，華哥終於情緒爆煲。佢憶述當時一個人嘅時候，就會開始胡思亂想，
例如會「好諗唔開」：「點解個天要咁樣對我，唔畀我有一個好結局。」「我都算係好人，點解會有咁嘅結局。」
諗返轉頭，華哥覺得自己當時真係鑽曬牛角尖，佢坦言：「分分鐘跟佢去埋！」華哥話好彩多得好兄弟、三哥苗僑偉兩公婆日日陪佢飲茶、打波、食飯傾偈。
將佢從最低點嘅谷底拉返上嚟。佢喺鏡頭前眼濕濕咁話：「真係好多謝佢。」雖然依家喪妻之痛已經漸漸平復，但太太嘅離開亦令華哥決定唔再拍戲。
佢話太太係佢嘅頭號fans，每次睇完佢拍嘅戲都會畀意見。依家太太走咗，「睇唔到我做戲，咁我仲做嚟做咩？」華哥呢一句，真係令人不勝唏噓～
雖然華哥多年嚟拍過無數經典劇集，但佢就話自己冇咩戲癮，拍戲只係工作。佢亦從來唔覺得自己係大明星，加上依家又冇咩經濟壓力，
自然選擇收山。而太太離世之後，華哥就話佢慢慢學識咗點樣同失去共存。雖然開頭好難，但係「仲要照顧阿女同屋企人」。
華哥嘅鐵漢柔情，喺呢個流量明星至上嘅年代，真係相當稀罕～
廣告贊助商
