by 「十優港姐冠軍」麥明詩相當慘。雖然她已經同前男友分手多年，各自都有另一半，但時不時會成為前度男友的「流量密碼」。
講的就是她聰明伶俐的前男友、香港騎呢網紅林作。最近麥明詩就被林作「暗寸」她只係「普通嘢」。相當聰明、幽默風趣、但成日鍾意抽水、老作嘅林作，
日前就係社交平臺發文大讚今屆港姐參選佳麗之一、劍橋一級榮譽畢業嘅施宇琪。林作話自己早喺多年前嘅一次派對上識咗施宇琪，
自己當時早已慧眼識英雄，叫過對方去選港姐。佢又表示，施宇琪先至係「真正才女」，因為對方係「一級榮譽畢業，唔係啲2:1普通嘢」。
即係施宇琪就劍橋大學一級榮譽畢業，他的前度麥明詩當年只係二級榮譽畢業。如此一拉一踩，好一個「普通嘢」，明顯又係抽嚇前度水。
麥明詩有啲咁嘅前度，真係該煨囉。除咗喺學歷上要將前度「比下去」之外，林作又覺得只有施宇琪先係本屆港姐冠軍心水。
仲叫對方退出金融圈，全職參賽，專心做藝人，否則「必死無疑」。同時林作又提到日前退賽嘅佳麗、冠軍大熱、區議員莊雅婷，
佢話因為對方冇「林作顧問」傍身所以要退賽。如果施宇琪搵佢出馬，一定星途無限。
林作仲話，佢最鍾意嘅港姐就係蔡思貝同馮盈盈（下圖左到右：蔡思貝、馮盈盈、施宇琪），
最唔鍾意嘅就係視帝鄭嘉穎嘅老婆陳凱琳咁話。查實早前林作就同現任女友、偷過食離過婚嘅前藝人裕美，一齊「狙擊」過前度麥明詩。
起因係因為林作嘅富貴阿媽王莉妮，早前就去探望產後嘅「前新抱」麥明詩同埋「哎呀孫」。其後冇打格仔就po咗BB相出嚟，
繼而被網民鬧爆唔識得尊重私隱。由於「未來奶奶」念念不忘「前新抱」，令到林作女友裕美非常妒忌，怒火中燒。
借機喺社交平臺暗指麥明詩故意設局，令有「分享症」嘅王莉妮中招。之後麥明詩出席活動被問到時，表示自己「中咗人圈套。」
一句「中咗圈套」即刻又被林作同裕美有水可抽，雙重狙擊。之後女嘅就質問：「你話你中圈套，難道係我設局？」
男嘅就公開警告前度：「唔好搞到我女人，我一定出嚟為佢出頭！」果然係「不是一家人不進一家門」嘅臭味相投，襯到絕。
講真的，作為一個男人，同前度都分咗手差唔多成10年啦，仲要經常抽人哋水、踩人哋呢樣嗰樣，即使表現不夠大方、但也別這麽小器吧。
本嚟大家各有各生活，就當作好來好去，但如今仲要喺網上逐句逐句、陰陰濕濕咁唱衰前度，邊有啲咁cheap嘅男人㗎，有冇人遇到過啊？
咁當然，能夠成為「香港騎呢網紅」的表表者，林作嘅所作所為又真係唔會令人太意外～
