by 近年關注港產片的觀眾，相信對鄧月平並不陌生。她在旦哥鄭丹瑞執導的電影《小男人週記3：吾家有喜》中飾演梁寬的女兒，
表現亮眼，更憑此角色入圍香港電影金像獎最佳新演員，備受矚目。現年27歲的鄧月平，入行接近十年，早在出道初期就因出眾的身材被媒體冠以「巨兇翠如」、
「巨兇超蓮」等稱號，令人印象深刻。雖然外界常聚焦於她的外貌與身形，但鄧月平絕非僅僅靠外表闖蕩。她的演技雖仍有成長空間，
但憑藉自然的表現和持續的努力，已逐步擺脫「花瓶」標籤，展現出作為演員的潛力與多元面貌。就好似佢最近代表香港地區參加嘅亞洲賽事《第11屆布城跆拳道挑戰賽》咁，
佢唔單止係首次參賽，仲奪得女子黑帶48公斤以下組別季軍，為港隊攞到銅牌。第一次參賽就有咁好嘅成績，對於一個唔係從細習武嘅女星嚟講，
已經好犀利㗎喇。而且呢個賽事仲係由國際跆拳道聯盟主辦，都可以稱之為亞洲高手雲集，所以喺咁激烈嘅競爭中攞到名次，銅牌成績已經相當唔錯。
其實早喺8月嘅時候，佢就已經喺香港地區嘅選拔賽當中越級挑戰成功，以第一名嘅資格代表出戰。而對於鄧月平嚟講，
佢就話能夠代表香港地區出戰已經係莫大榮幸，因為馬來西亞嘅選手實力強勁，所以「攞到銅牌已經非常開心！」佢仲話由演員跨界成為運動員，
心理質素同體能都得到好好嘅鍛鍊，咁即係如果有機會拍打女，鄧月平使出嘅都唔會係花拳繡腿。至於點解會學跆拳道，佢就話源於4年前拍動作電影時，
由於budget同時間有限，唯有靠自己應付動作場面，所以開始學跆拳道。之後慢慢產生興趣，又有前輩鼓勵，所以繼續練落去，
幾時都話興趣係最好嘅老師，可以將興趣發展成半個事業仲攞埋獎，真係要鼓掌。而且仲有機會轉型為新生代動作女演員，
都係一條好唔錯嘅出路，加上依家港產片市道唔好，想拍打戲動作戲慳budget都唔使下下搵替身吖嘛。講起藝人轉型運動員，
又諗起坤哥吳業坤早前都係代表香港地區出戰亞洲空手道聯盟選拔賽。雖然坤哥已經35岁，但佢就話追夢唔一定要年輕人先做得到。
（唔做歌手，唔做演員，佢要做香港運動員！！）希望視「演戲係我無法捨棄嘅夢想」嘅鄧月平，都可以又打得又演得啦，
起碼佢已經證明咗自己唔係花瓶。你覺得呢？
